28 May - Müstəqillik Günü Bosniya və Herseqovinada qeyd olunub

27 may 2024-cü il tarixində Azərbaycan Respublikasının Bosniya və Herseqovinadakı səfirliyi 28 May - Müstəqillik Günü münasibətilə rəsmi qəbul təşkil edib.

Mərasimdə Bosniya və Herseqovinanın Rəyasət Heyətinin serb üzvü xanım Jelyka Tsviyanoviç, Bosniya və Herseqovinada fəaliyyət göstərən diplomatik korpusun, dövlət qurumlarının, parlamentin, ictimai, mədəni və işgüzar dairələrin, Sarayevoda yerləşən universitetlərin və elmi müəssisələrin KİV-lərin təmsilçiləri, bu ölkədə təhsil alan tələbələrimiz iştirak ediblər.

Ölkəmizin Bosniya və Herseqovinadakı səfiri Vilayət Quliyev tədbirdə çıxış edərək,106 il əvvəl mayın 28-də müsəlman dünyasında ilk parlamentli demokratik dövlət - Azərbaycan Xalq Cümhuriyyətinin (AXC) qurulduğunu bildirib, onun müstəqillik yolu haqqında danışıb. Prezident İlham Əliyevin rəhbərliyi ilə bu gün müstəqil, suveren və demokratik ölkəmizin Cümhuriyyətin məqsəd və ideallarını həqiqətə çevirdiyini, beynəlxalq ictimaiyyət üçün etibarlı tərəfdaş olduğunu vurğulayıb.

Eyni zamanda, Ali Baş Komandan İlham Əliyevin rəhbərliyi ilə rəşadətli Ordumuzun qəhrəmanlığı sayəsində 2020-ci ildə Azərbaycanın öz ərazi bütövlüyünü bərpa etdiyini, bu gün Azərbaycan dövlətinin Qarabağ və Şərqi Zəngəzurda geniş bərpa-quruculuq işləri apardığı xüsusi qeyd olunub.

Səfir Azərbaycanın  bu il COP29-a ev sahibliyi etdiyini və bu istiqamətdə görülən işlər, bərpaolunan enerji sahəsində atılan mühüm addımlar, işğaldan azad edilmiş ərazilərimizdə həyata keçirilməkdə olan “ağıllı şəhər” və “ağıllı kənd” konsepsiyası, “xalis sıfır emissiya” zonası və “yaşıl enerji” layihələri barədə tədbir iştirakçılarını məlumatlandırıb.

Azərbaycan-Bosniya və Herseqovina münasibətləri haqqında məlumat verən diplomat yüksəksəviyyəli qarşılıqlı səfərlərin əhəmiyyətindən və ikitərəfli əməkdaşlığın inkişafından danışıb. Geniş potensiala malik olan bu əlaqələrin inkişafı baxımından görülməsi vacib olan işlərdən danışıb.

Tədbir çərçivəsində Sarayevo Universitetinin siyasi elmlər fakültəsində təhsil alan həmyerlimiz Rəfail Cəfərov Azərbaycan mahnıları ifa edib.

Səfirliyin təşəbbüsü ilə boşnak dilinə tərcümədə nəfis şəkildə çap olunan “Qarabağın incisi -Şuşa” ensiklopedik soraq kitabçası iştirakçılara hədiyyə edilib.

Azərbaycanın milli günü ilə bağlı qəbul mərasimi yerli KİV-lər, o cümlədən televiziya vasitəsi ilə geniş işıqlandırılıb.