Bosniya və Herseqovinada Xocalı faciəsindən bəhs edən kitabın və eyni adlı filmin təqdimatı keçirilmişdir

21 fevral 2020-ci il tarixində Bosniya və Herseqovinanın paytaxtı Sarayevo şəhərində Azərbaycan Respublikasının Serbiyada, Bosniya və Herseqovinada (BvH) və Monteneqroda Səfirliyinin dəstəyi və təşkilatçılığı ilə Xocalı soyqırımının 28-ci ildönümü ilə əlaqədar Sarayevo Beynəlxalq Universitetində keçirilən tədbir çərçivəsində 1992-ci il fevralın 25-dən 26-na keçən gecə Xocalıda baş vermiş soyqırımı zamanı qətlə yetirilmiş 63 uşağın faciəli həyatından bəhs edən jurnalist Səriyyə Müslim qızının müəllifi olduğu “Onlar heç vaxt böyüməyəcəklər” kitabının və eyni adlı filmin təqdimatı keçirilmişdir.

Tədbirdə BvH və Azərbaycandan beynəlxalq hüquq üzrə nüfuzlu hüquqşünaslar, tanınmış ictimai-siyasi xadimlər, millət vəkilləri, qeyri-hökumət təşkilatları, diplomatik korpus, Srebrenitsa və Jepa anklavlarının Anaları Hərəkatının və KİV nümayəndələri iştirak etmişlər.

Tədbir iştirakçıları konfransın əvvəlində bir dəqiqəlik sükutla Xocalı soyqırımı qurbanlarının xatirəsini anmışlar.

Azərbaycanın Serbiyada, Bosniya və Herseqovina və Monteneqroda səfiri Eldar Həsənov, Sarayevo Beynəlxalq Universitetinin rektoru professor Ahmet Yıldırım, kitabın müəllifi Səriyyə Müslim qızı, Sarayevo Universitetinin professoru, hüquq elmləri doktoru Edin Halapiç və eləcə də professor Sabahudin Hadjialiç (Assoc. Prof. Dr & Dr. Honoris Causa) tədbirdə çıxış etmişlər.

Natiqlər çıxışları zamanı Azərbaycanın Xocalı şəhərinə 1992-ci ildə fevralın 25-dən 26-na keçən gecə Ermənistan silahlı qüvvələrinin qəfildən hücum etdiyini, mülki insanların, o cümlədən 63 uşağın xüsusi qəddarlıqla və amansızcasına öldürüldüyünü, bir qisminin ağır yaralandığını, əsir alınıb işgəncələrə məruz qoyulduğunu və itkin düşdüyünü xatırladaraq Xocalıda törədilən bu etnik təmizləmə cinayətlərin Ermənistanın sistematik xarakter daşıyan zorakılıq siyasətinin bir hissəsi olduğunu, bu siyasətin əsasında ermənilərin irqi üstünlüyünü və azərbaycanlılara qarşı nifrəti aşılayan njdeizm ideologiyasının dayandığını, Xocalıdakı hadisələrin soyqırımı cinayəti kimi tövsiyə edilməli olduğunu və beynəlxalq hüquq əsasında Ermənistanın və onun siyasi-hərbi rəhbərliyinin törədikləri bu cinayətlərə görə məsuliyyət daşıdığını birmənalı qeyd etmişlər.

Azərbaycanın Bosniya və Herseqovinada səfiri E.Həsənov Bosniya və Herseqovina Parlamentinin Xalqlar Palatası tərəfindən 2013-cü ilin 26 fevral tarixində, məhz Xocalı qətliamı törədilən gün „Azərbaycan Respublikasının suverenliyinin və ərazi bütövlüyünün tanınması və hörmət olunması“ adlanan qətnamənin qəbulunu xatırlamışdır. O, qətnamədə Xocalıdakı hadisələrə siyasi qiymətin verildiyini qeyd edərək bu kimi sənədlərin, çağırış və bəyanatların beynəlxalq ədalətə, sülh və təhlükəsizliyə bir töhfə olduğunu bildirmişdir.

Kitabın müəllifi jurnalist Səriyyə Müslim qızı yaşadığı acıları, zülümləri tədbir iştirakçılarının diqqətinə çatdırmışdır.     

Tədbirdə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə çəkilmiş və Diplomatik Nümayəndəliyin dəstəyi ilə boşnak dilinə (subtitr) tərcümə edilmiş, Xocalıda şəhid olmuş 63 uşaqdan bəhs edən “Onlar heç vaxt böyüməyəcəklər” filmi nümayiş olunmuşdur.

Həmçinin, Xocalı soyqırımının 28-ci ildönümü ilə bağlı Sarayevo Beynəlxalq Universitetinin sərgi zalında bu faciəyə həsr olunmuş foto və rəsm sərgisi təşkil olunmuş, TRT World tərəfindən çəkilmiş “Black Orchards: Azerbaijan and Armenia’s Wars” sənədli film nümayiş edilmişdir.

Tədbir iştirakçıları həmin gün Sarayevo şəhərində Heydər Əliyev Fondunun təşəbbüsü, Azərbaycan dövlətinin maliyyə dəstəyi ilə əsaslı təmir və bərpa edilmiş “Dostluq parkı”nda Xocalı soyqırımı qurbanlarının xatirəsinə ucadılmış abidə kompleksini ziyarət etmişlər. Abidə önünə əklil qoyan tədbir iştirakçıları faciə qurbanlarının xatirəsini yad etmişlər.